SURBISA Bilboko jabeek euren eraikin, etxebizitza eta lokalak birgaitzea sustatzen duen udal-elkartea da. Esku hartzeko eremuak Bilboko Udalak agintzen dizkionak dira: Zazpikaleak, Gurutze auzoa, Bilbo Zaharra, Trenbideetako Langileen auzoa, Irala, Olabeaga eta Zazpilanda. Surbisak bi helburu ditu: batetik, eraikitako ondarea segurua, irisgarria eta efizientea izatea, eta kalitatezko etxebizitzak eskaintzea, eta, bestetik, bere eraginpeko eremuetan bizikidetza erraztea. Surbisaren lanak bizi-kalitatea hobetzea eta jarduera eta aberastasun ekonomikoa sortzea du xede.
Surbisako organo sozialak batzar nagusia —Udalbatza— eta administrazio-kontseilua dira, eta berezko lehendakaria Bilboko alkatea da. Kontseiluaren indarraldia lau urtekoa da, eta, edonola ere, bat dator haren izendapena egiten deneko udal-mandatu politikoarekin.
Diziplina anitzeko profesional-talde batek osatzen du, eta, auzokideen interesen alde eta hurbiltasunez, hiri-birgaitzea bultzatzeko helburua lortzeko egiten du lan, bere eraginpeko eremuetako eraikinetan bizi diren pertsonen bizi-kalitatea hobetzeko.
Noiz sortu zen SURBISA?
SURBISA 1985eko urtarrilaren 16an eratu zen, Bilboko Zazpikaleetako hirigintza birgaitzeko prozesua (auzoko Birgaitze Plan Berezian aurreikusia) kudeatzeko. 1994an, lehen aldiz zabaldu zen sozietatearen xedea, Bilbo Zaharra Birgaitzeko eta Barne Erreformarako Plan Berezia kudeatzeko; plan horrek Bilbo Zaharra, San Frantzisko eta Zabala auzoak hartu zituen barne.
Ondorengo urteetan, Surbisak beste auzo batzuk hartu ditu, hala nola Trenbideetako Langileen auzoko Zabala kalea (2003), Rekalde auzoko Artatzu Bekoa (2005) eta Zorrotzaurreko egoitza-eraikinak (2007). Gainera, igogailuen instalazioa kudeatzen lagundu zien Otxarkoaga auzoko eta Gurutze auzoko auzokideen erkidegoei (2008-2018 eta 2009, hurrenez hurren). Bestalde, 2012tik 2021era bitartean, SURBISAk auzo gehiagotan esku hartu zuen, eta, horietatik, hauek izan ziren lehentasunezkoak: Olabeaga, Zazpilanda (Zorrotza), Irala eta San Inazio.
2022tik 2024ra bitartean esku-hartzea Uribarri eta Uretamendi auzoetara zabaltzea aurreikusten da.
Zein da SURBISAren helburua?
Bilboko aldiriko eremurik kalteberenetako hiri-birgaitze integrala, irisgarria, jasangarria eta inklusiboa
Titulartasun pribatuko eraikinen eta haien inguruaren birgaitzea bultzatzea, energia-efizientziaren, irisgarritasun unibertsalaren eta kohesio sozialaren irizpideen arabera, hiri-eredu adimentsuagoa, jasangarriagoa eta sozialki inklusiboagoa sortzeko.
Titulartasun pribatuko ondare urbanizatua eta eraikia birgaitzeko jarduketak sustatzea, segurua, irisgarria eta efizientea izan dadin, eta kalitatezko etxebizitzak eskain ditzan, inor atzean uzten ez duen ingurune batean.
Hiri-birgaitzea jarduera mobilizatzeko eta aberastasuna sortzeko tresna izan dadin lortzea, eta aberastasun hori hirira zuzenean edo zeharka itzultzeko.
